काठमाडौँ । केन्द्रीय कारागार सुन्धाराबाट आन्दोलनको मौका छोपेर फरार भएका कर्तव्य ज्यान मुद्दाका एक कैदीलाई प्रहरीले काभ्रेको पाँचखलबाट पुनः पक्राउ गरेको छ।

खोटाङको दिप्सुङ गाउँपालिका–४ स्थायी घर भई हाल काभ्रेको पाँचखल नगरपालिका–७ शिखरपुर बस्दै आएका ४३ वर्षीय धिरज भनिने मोतिधन राईलाई काठमाडौँ उपत्यका अपराध अनुसन्धान कार्यालयको टोलीले पक्राउ गरेको हो।

प्रहरीले उनलाई पाँचखल नगरपालिका–७ शिखरपुरबाट नियन्त्रणमा लिएको जनाएको छ। पक्राउ परेका राईलाई आवश्यक कानुनी कारबाहीका लागि केन्द्रीय कारागार जगन्नाथदेवल, सुन्धारा पठाइएको छ।

घटनाको विवरणअनुसार वि.सं. २०७५ भदौ ३ गते बिहान काठमाडौँको टोखा नगरपालिका–४ विष्णुमती पुलस्थित एक बंगुर फार्ममा छत्तर सिंह राई भनिने छत्र सिंह राईलाई बाँसको लाठीले कुटपिट गरी हत्या गरिएको थियो। उक्त कर्तव्य ज्यान मुद्दामा काठमाडौँ जिल्ला अदालतले वि.सं. २०७६ असोज १ गते मोतिधन राईलाई जन्मकैद अर्थात् २५ वर्ष कैद सजाय सुनाएको थियो।

अदालतको फैसलापछि कैद भुक्तानका लागि केन्द्रीय कारागार सुन्धारामा रहेका राई गत वर्ष २०८२ भदौ २४ गते आन्दोलन तथा झडपको मौका पारेर फरार भएका थिए। त्यसयता प्रहरीले उनको खोजी तीव्र बनाएको थियो।

काठमाडौँ उपत्यका अपराध अनुसन्धान कार्यालयका सूचना अधिकारी तथा प्रहरी उपरीक्षक रामेश्वर कार्कीका अनुसार विशेष टोलीले सुराकीका आधारमा उनलाई लुकिछिपी बसिरहेको अवस्थामा पक्राउ गरेको हो।