काठमाडौं — सभामुख डोलप्रसाद अर्यालले प्रतिनिधिसभाका सचिव हर्कराज राईसँग कार्यसम्पादनमा देखिएको समस्याबारे औपचारिक स्पष्टीकरण माग गरेका छन्। संसद् सचिवालयको काम प्रभावकारी नभएको र संसदीय गतिविधि सुस्त बनेको गुनासो बढेपछि सभामुखले यो कदम चालेका हुन्।

स्रोतका अनुसार राईमाथि विशेषगरी संसदीय विषयगत समितिहरूलाई सक्रिय बनाउन नसकेको आरोप लागेको छ। लामो समयदेखि समितिहरू निष्क्रिय जस्तै बनेको र आवश्यक छलफल तथा निगरानीको काम अपेक्षाअनुसार अघि बढ्न नसकेको भन्दै असन्तुष्टि बढ्दै गएको थियो।

यस्तै, प्रतिनिधिसभाको बैठक सञ्चालनका क्रममा सांसदहरूलाई बोल्न दिने समय व्यवस्थापनमा पनि पक्षपातपूर्ण प्रस्ताव ल्याइएको भन्दै आलोचना भएको छ। कतिपय सांसदहरूले निष्पक्षता कायम नभएको गुनासो राखेपछि सभामुखले उक्त विषयलाई गम्भीर रूपमा लिँदै स्पष्टीकरण सोधेका हुन्।

संवैधानिक व्यवस्था अनुसार प्रतिनिधिसभाका सचिवको कार्यसम्पादन सन्तोषजनक नभएमा सभामुखले राष्ट्रपतिसमक्ष सिफारिस गर्न सक्ने प्रावधान छ। सो सिफारिसपछि सचिवलाई पदबाट हटाउने कानुनी प्रक्रिया अघि बढ्न सक्छ।

यस घटनालाई संसद् सचिवालयभित्र देखिएको व्यवस्थापन कमजोरी र जवाफदेहिताको सवालसँग जोडेर हेरिएको छ। अब सचिव राईले दिने स्पष्टीकरणले आगामी निर्णयको दिशा तय गर्ने अपेक्षा गरिएको छ।