काठमाडौं । पाँचथरको हिलिहाङ गाउँपालिका–७ स्थित श्री जय भवानी माध्यमिक विद्यालयअन्तर्गत सञ्चालित बालविकास केन्द्रमा कार्यरत सहयोगी कार्यकर्ता बिना कुमारी राईविरुद्ध नक्कली शैक्षिक प्रमाणपत्र पेश गरी जागिर खाएको आरोपमा भ्रष्टाचार मुद्दा दायर भएको छ।

अख्तियार दुरुपयोग अनुसन्धान आयोगले राईविरुद्ध कैद र जरिवानाको मागसहित बुधबार विशेष अदालत काठमाडौंमा आरोपपत्र दायर गरेको हो।

आयोगका अनुसार राईले बालविकास सहजकर्ताको पदमा नियुक्ति लिन कक्षा ८ र एसएलसीको लब्धाङ्कपत्र तथा चारित्रिक प्रमाणपत्र झुट्टा र नक्कली पेश गरेको पुष्टि भएको छ। नक्कली शैक्षिक योग्यताका आधारमा सरकारी सेवा तथा सुविधा लिएको आरोपमा उनीविरुद्ध मुद्दा दायर गरिएको आयोगले जनाएको छ।