संयुक्त विद्यार्थी संगठनहरूले पेट्रोलियम पदार्थको मूल्यवृद्धिको विरोधमा माइतीघर मण्डलामा प्रदर्शन गरेका छन्। बढ्दो मूल्यवृद्धिले जनजीवन प्रभावित भएको भन्दै उनीहरूले सरकारविरुद्ध नाराबाजी गरेका थिए।

प्रदर्शनकारीहरूले पेट्रोलियम पदार्थको मूल्य तत्काल नियन्त्रण गर्न र यसमा थपिएको अतिरिक्त कर खारेज गर्न सरकारसँग माग गरेका छन्। उनीहरूको भनाइमा मूल्यवृद्धिले यातायातदेखि दैनिक उपभोग्य वस्तुसम्मको मूल्यमा असर परेको छ।

प्रदर्शनका क्रममा विद्यार्थीहरूले भान्सामा प्रयोग हुने कराइ, डाडु लगायतका सामग्री बोकेर विरोध जनाएका थिए। यसले मूल्यवृद्धिले प्रत्यक्ष रूपमा घरायसी खर्चमा परेको असरलाई प्रतीकात्मक रूपमा प्रस्तुत गरेको उनीहरूले बताएका छन्।

विद्यार्थी संगठनहरूले माग सम्बोधन नभए थप कडा आन्दोलनका कार्यक्रम घोषणा गर्ने चेतावनीसमेत दिएका छन्।