नेपाल प्रहरी प्रधान कार्यालयले सिन्धुलीको इलाका प्रहरी कार्यालय खुर्कोटको हिरासतमा एक थुनुवाको मृत्यु भएको घटनाबारे छानबिन गर्न एक उच्चस्तरीय समिति गठन गरेको छ।

​प्रहरी महानिरीक्षकको सचिवालयले जारी गरेको पत्रअनुसार, सिन्धुलीको सुनकोशी गाउँपालिका–३ का २३ वर्षीय श्रीकृष्ण बि.क.को हिरासतमा मृत्यु भएपछि सत्यतथ्य पत्ता लगाउन राष्ट्रिय प्रहरी प्रशिक्षण प्रतिष्ठानका प्र.ना.म.नि. दिनेश कुमार आचार्यको संयोजकत्वमा छानबिन समिति बनाइएको हो।

​घटनाको विवरण:

जबरजस्ती करणी मुद्दामा अनुसन्धानका लागि सिन्धुली जिल्ला अदालतबाट ७ दिनको म्याद थप भई न्यायिक हिरासतमा रहेका बि.क.ले मिति २०८३ वैशाख ७ गते साँझ करिब ७:५९ बजे हिरासत कक्षको शौचालयमा आफ्नै सर्टको पासो लगाएको अवस्थामा फेला परेका थिए। उपचारका क्रममा उनको मृत्यु भएपछि घटनाले गम्भीर मोड लिएको थियो।

​छानबिन समितिका सदस्यहरू:

गठित समितिमा संयोजक आचार्यका साथै निम्न प्रहरी अधिकारीहरू सदस्यका रूपमा रहेका छन्:

१. प्र.उ. रबिन्द्र नाथ पौडेल (नेपाल प्रहरी प्रधान कार्यालय, यू.एन. शाखा)

२. प्र.नि. ईन्द्रजित सुनार (नेपाल प्रहरी प्रधान कार्यालय, केन्द्रीय अनुसन्धान ब्यूरो)

३. प्र.नि. प्रेम रेग्मी (काठमाडौँ उपत्यका अपराध अनुसन्धान कार्यालय)

४. प्र.ना.नि. राजेश्वर सापकोटा (काठमाडौँ उपत्यका अपराध अनुसन्धान कार्यालय)

​प्रहरी महानिरीक्षक दानबहादुर कार्कीद्वारा हस्ताक्षरित उक्त पत्रमा समितिलाई घटनाको वस्तुनिष्ठ र तथ्यगत छानबिन गरी ७ (सात) दिनभित्र प्रतिवेदन पेश गर्न निर्देशन दिइएको छ। घटनाको संवेदनशीलतालाई ध्यानमा राख्दै विभिन्न विभागहरूलाई समेत यसबारे बोधार्थ पठाइएको छ।