दक्षिण भारतीय चलचित्र उद्योग (कोलिउड) का सुपरस्टार जोसेफ विजय चन्द्रशेखर, जो ‘थलपति विजय’ को नामले चर्चित छन्, उनको आधिकारिक सम्पत्ति विवरण सार्वजनिक भएको छ। हालै सार्वजनिक भएको निर्वाचन शपथपत्र (Election Affidavit) का आधारमा तयार पारिएको रिपोर्ट अनुसार विजयको कुल सम्पत्ति भारतीय रुपैयाँ ६२४ करोड रहेको देखिएको छ।

बैंकिङ मौज्दात र वित्तीय अवस्था

विजयको वित्तीय व्यवस्थापन निकै बलियो देखिएको छ। विवरण अनुसार उनको विभिन्न बैंक खातामा मात्रै २१३ करोड रुपैयाँ नगद मौज्दात (Savings) रहेको छ। उनले १०० करोड रुपैयाँ मुद्दती निक्षेप (Fixed Deposits) मा राखेका छन्।

बैंकगत विवरण हेर्दा उनले एक्सिस बैंकमा ४० करोड, इन्डियन ओभरसिज बैंकमा २५ करोड, एचडीएफसी बैंकमा २० करोड र स्टेट बैंक अफ इन्डिया (एसबीआई) मा १५ करोड रुपैयाँ जम्मा गरेका छन्। यस्तै, उनको सेयर बजारमा (Equity Holdings) १९.३७ लाख रुपैयाँ बराबरको लगानी रहेको छ।

घरजग्गा र विलासी सम्पत्ति

विजयको स्थिर सम्पत्ति (Immovable Assets) को हिस्सा पनि ठूलो छ। उनीसँग कुल २२० करोड रुपैयाँ बराबरको अचल सम्पत्ति रहेको छ। जसमा:

• १० वटा आवासीय घरहरू: जसको कुल मूल्य ११५ करोड रुपैयाँ छ।

• व्यापारिक भवनहरू: ८२.८ करोड रुपैयाँ बराबरको व्यावसायिक लगानी।

• जमिन: २२ करोड रुपैयाँ बराबरको गैर-कृषि भूमि।

महँगा गाडी र गहनाको सोख

सवारी साधनका सौखिन विजयसँग विलासी गाडीहरूको ठूलो कलेक्सन छ। उनीसँग ६ करोड मूल्यको टाटा क्याराभान र ३.०१ करोडको लेक्सस ३५० जस्ता महँगा सवारी छन्। यसका साथै उनीसँग बीएमडब्लू आई-७ (२ करोड), टोयोटा वेलफायर (१.६३ करोड), र बीएमडब्लू ५३० (८०.५४ लाख) पनि रहेका छन्। रोचक कुरा के छ भने उनीसँग एउटा मारुती स्विफ्ट (५.३५ लाख) र करिब ६७ हजार मूल्यको टिभिएस एक्सएल सुपर (TVS XL Super) मोपेड पनि रहेको छ।

गहना तर्फ विजयसँग ५.२७ करोडको सुन, १ करोडको हीरा र १९.७५ लाख रुपैयाँ बराबरको चाँदीका गहनाहरू रहेका छन्।

पछिल्लो समय राजनीतिमा सक्रिय हुने घोषणा गरेका अभिनेता विजयको यो आर्थिक विवरणले उनको सफल फिल्मी करियर र बुद्धिमानीपूर्ण लगानीलाई प्रस्ट पारेको छ।