सुदन किराती ले श्रम संस्कृति पार्टी मा वरिष्ठ नेताको जिम्मेवारी पाउने भएका छन्।

किराती पक्षका एक नेताका अनुसार पार्टी एकतापछि उनलाई वरिष्ठ नेताको भूमिका दिइनेछ भने एक उपाध्यक्ष, एक सचिव र १५ जना केन्द्रीय सदस्यसमेत समावेश गर्ने सहमति भएको छ।

यो सहमति बिहीबार राति ललितपुर मा हर्क साम्पाङ र सुदन किरातीबीच भएको बताइएको छ।

दुवै नेताले आज बागबजार स्थित हार्दिक होटल मा अपराह्न ३ बजे कार्यक्रम आयोजना गरी पार्टी एकताको औपचारिक घोषणा गर्ने तयारी गरेका छन्।

भोजपुर का सुदन किराती पूर्वमाओवादी नेता हुन्। उनी पूर्व पर्यटनमन्त्री समेत बनेका थिए। पछि पुष्पकमल दाहाल ‘प्रचण्ड’, माधवकुमार नेपाल लगायत नेताहरूबीच पार्टी एकता भई नेपाल कम्युनिस्ट पार्टी गठन भएपछि असन्तुष्टि जनाउँदै उनी प्रगतिशील लोकतान्त्रिक पार्टी (प्रलोपा) मा आबद्ध भएका थिए।

जनार्दन शर्मा को पहलमा गठन भएको प्रलोपा पार्टीमा किराती पाँच सदस्यीय अध्यक्ष परिषद्का सदस्य थिए। तर २१ फागुनको निर्वाचनपछि उनले पार्टी परित्यागको घोषणा गरेका थिए।