त्रिभुवन अन्तर्राष्ट्रिय विमानस्थलस्थित अध्यागमन कार्यालयले खाडी मुलुक, विशेषगरी संयुक्त अरब इमिरेट्स (UAE) जान लागेका नेपाली युवाहरूको राहदानी (पासपोर्ट) मा नै ‘काम गर्न निषेध’ लेख्न थालेपछि नयाँ विवाद उत्पन्न भएको छ।

​अध्यागमनले भिजिट भिसामा जाने यात्रीहरूको पासपोर्टको ‘डिर्पाचर’ छाप मुनि हातले नै “Employment is strictly prohibited” (रोजगारीमा संलग्न हुन सख्त निषेध) र “UAE Visit Only” जस्ता चेतावनी लेख्न थालेको हो।

​ भिजिट भिसामा जान लागेका तर भित्री रूपमा कामको खोजीमा रहेका हजारौँ युवाहरू यो नियमका कारण समस्यामा परेका छन्।

​ कानुनी रूपमा जारी गरिएको सरकारी दस्तावेज (पासपोर्ट) मा यसरी हातले केरमेट गर्नु वा चेतावनी लेख्नु अन्तर्राष्ट्रिय मापदण्ड विपरीत हुने विज्ञहरूको तर्क छ।

​ सरकारले भिजिट भिसामा गएर काम खोज्ने र पछि अलपत्र पर्ने क्रम रोक्न यो कदम चालेको दाबी गरे पनि, यसले विमानस्थलमा हुने ‘सेटिङ’ र युवाहरूलाई दिइने सास्तीलाई झन् बढावा दिने आशंका गरिएको छ।

​किन गरियो यस्तो?

​अध्यागमन विभागका अनुसार, पछिल्लो समय भिजिट भिसाको दुरुपयोग गरी मानव तस्करहरूले युवाहरूलाई विदेश लैजाने र त्यहाँ पुगेपछि अलपत्र पार्ने घटना बढेकाले पूर्व-सतर्कताका लागि यो निर्णय लिइएको हो। पासपोर्टमा लेखिएको यो चेतावनीले सम्बन्धित देशको अध्यागमनलाई पनि ती व्यक्ति कामदार नभई पर्यटक मात्र हुन् भन्ने जानकारी दिने सरकारी उद्देश्य रहेको बुझिएको छ।

​तर, सर्वसाधारण र वैदेशिक रोजगार क्षेत्रका जानकारहरूले भने यसलाई ‘अव्यवहारिक’ र ‘नागरिकको हिँडडुल गर्न पाउने अधिकारमाथिको हस्तक्षेप’ भनेर टिप्पणी गरिरहेका छन्।